Kiú-kiong:〈4：44：44〉
我咧捷運車箱，手機仔共揤，時間下晡四點四十四分。
我雄雄精神過來。眯一下電子亂鐘，拄拄仔好是四點四十四分四十四秒。若拄好看著一排相仝的數字，聽講這號做「天使數字」，是上天欲報予人知的消息。
這是一个兆頭，但是彼陣我猶閣啥物攏毋知，毋知是按怎佇這烏暗暝清醒甲。
一排四擺做伙，予我看甲花花讀攏無，敢若真生份，數字變做一枝一枝刀仔。
我掠準講人睏落眠，若成生出一粒大粒泡共人包起來，夢裡烏暗無底，偌爾仔安穩平靜。人若欲精神，袂輸有一枝刀仔共泡黜予破，lak落來現實。
我去便所，一肢跤閣踏佇夢內底，磚仔地若竹篙橋㽎咧㽎咧，干焦精神轉來爾。我坐佇馬桶頂面加減放，放尿了後人敢若會較好睏。
天猶未光，暝時睏甲一半精神上討厭，好好的睏眠破破去，這馬起來嫌傷早，欲睏閣睏袂去。
[…]
Góa leh chia̍t-ūn chhia-siuⁿ, chhiú-ki-á kā chhi̍h, sî-kan sī ē-po͘ sì tiám sì cha̍p sì hun.
Góa hiông-hiông cheng-sîn kòe—lâi. Bî chi̍t-ē tiān-chú loān-cheng, tú-tú-á-hó sī sì tiám sì cha̍p sì hun sì cha̍p sì bió. Nā tú hó khoànn-tio̍h chi̍t pâi sio-kāng ê sò͘-jī, thiaⁿ-kóng che hō-chò “thiⁿ-sài sò͘-jī”, sī chiūⁿ-thiⁿ beh pò hō͘-lâng chai ê siau-sit.
Che sī chi̍t-ê tiāu-thâu, tān-sī hit-chūn góa iáu-koh siáⁿ-mi̍h lóng m̄ chai, m̄ chai sī án-choánn tī che o͘-àm-mê chheng-chhéⁿ kah.
Chi̍t pâi sì pái chò-hóe, hō͘ góa khoànn kah hoe-hoe tha̍k lóng bô, kám-ná chin seⁿ-hūn, sò͘-jī piàn-chò chi̍t-ki chi̍t-ki to-á.
Góa lia̍h-chún kóng lâng khùn-lo̍h-bîn, nā sêng seⁿ-chhut chi̍t lia̍p tōa lia̍p pho kā-lâng pau khí-lâi, bang—nih o͘-àm bô té, gōa-nī á an-ún pêng-chēng. Lâng nā-beh cheng-sîn, bē-su ū chi̍t-ki to-á kā pho thuh hō͘ phòa, lak lo̍h-lâi hiàn cha̍t.
Góa khì piān-só͘, chi̍t ki kha koh ta̍h tī bāng lāi-té, chng-á tē nā tek-ko kiô sìm leh sìm leh, kan-ta cheng-sîn tńg—lâi nī. Góa chē tī bé-tháng téng-bīn ke-kiám pàng, pàng-jiō liáu-āu lâng kám-ná ē khah-hó khùn.
Thiⁿ iáu-bōe-kuiⁿ, mê—sî Khùn kah chi̍t-pòaⁿ cheng-sîn siāng thó-ià, hó-hó ê khùn-bîn phòa-phòa khì, chit-má khí-lâi hiâm siuⁿ-chá, beh khùn koh khùn-bē-khì.
[…]
Preorder the paperback!
In June 2025, Tâigael: Stories from Taiwanese and Gaelic will be published in handsome paperback edition. Four stories by four writers in four languages! Pre-order by May 1st 2025 to get your name listed as one of our supporters in the book!
